ლენტეხის მუნიციპალიტეტის სოფელ ზესხოს ტყეში გაჩენილი ხანძრის  ლოკალიზებას შსს-ს სასაზღვრო პოლიციის ვერტმფრენი ცდილობს , - ამის შესახებ ინფორმაციას საგანგებო სიტუაციების მართვის სამსახური ავრცელებს.

უწყების ინფორმაციით, ამ დროისათვის ადგილზე 120-ზე მეტი მეხანძრე-მაშველი მუშაობს,რომელთაც ცეცხლის რამდენიმე ღია კერის ლიკვიდირება მოახერხეს.

“ხანძრის ქრობის პროცესი მთელი ღამის განმავლობაში მიმდინარეობდა. არსებობდა საფრთხე, რომ ცეცხლი მთის ზედა საფარზე გავრცელებულიყო, თუმცა მეხანძრე-მაშველების აქტიური რეაგირების შედეგად ცეცხლი დიდ ფართობზე არ გადასულა. საგანგებო სიტუაციების მართვის სამსახურმა ადგილობრივი მეხანძრე-მაშველების გარდა ადგილზე მოახდინა დამატებითი ტექნიკისა და ცოცხალი ძალის მობილიზება. ადგილზე მობილიებულია დამატებითი ჯგუფები თბილისიდან და იმერეთის რეგიონიდან"-განაცხადეს უწყებაში.

შეგახსენებთ, რომ ტყეში ხანძარი დილის საათებში, ადგილობრივმა მოსახლეობამ შეამჩნია. ხანძრის ლოკალიზების სამუშაოები კი ამ დრომდე მიმდინარეობს...